Runokuukausi Polarbibblossa!
21 päivä marsia oon Maailman runhouen päivä. Silloin fiirathaan runoja ja kertomista. Met Polarbibblossa olema siksi tehnyt koko mars kuukauen runokuukaueksi! Kirjota sinun omia runoja, lue muitten kirjottamia runoja ja levitä runhoutta!
Sie joka lähätät sisäle runon mars kuukauen aikana ja ilmottaut lotterhiin, sulla oon mahollisuus voittaa yksi meän fiinistä pehmopöllöistä. Met lottaama ulos viis pöllöä. Voittajat veethään aprillin alussa.
Oleks kirjottannu runoja ennen? Eli tarviks sie inspiraatiota enneko saatat alottaa? Met autama sinua!
Sanakone
Mitä sanoja sie valittet? Ja mistä sinun runo kertoo? Kysy meän sanakonheelta apua! Se antaa sulle sattumalta sanan joka saattaa pistää sinun fantasiin käynthiin.
Kirjotusharjotuksia
Tästä alta löyät muutaman tipsin ja kirjotusharjotuksia. Net oon rohki hyviä authaan sinua pääsheen sinun mestariteoksen alkhuun!
Ota aikaa - ota framile kello. Kirjota yhen minuutin aikana ylös kaikki sanat mikkä sulla tullee miehleen. Kaikki sanat oon yhtä hyvät. Lue sitte minuutin päästä läpi sinun sant. Oliko sielä joku sana mistä sie tykkäsit rohki paljon? Joku sana mistä sie et tykänny ollekhaan? Kirjotiks sie ylös joitaki hauskoja sanoja? Färikhäitä sanoja? Surulisia sanoja? Valitte muutama sinun sanoista ja kirjota niistä runo. Sie saatat laittaa siihen lissää sanoja. Sie saatat kansa piirtää riitninkin ja kirjottaa ylös net sanat jokka sie olet valinnu.
Vaiha sana - tässä harjotuksessa teietä häätyy olla kaksi. Kirjota ylös kolme sannaa jokka sie tykkäät ette passaa hyvin aiheesseen kevä. Älä hunteeraa liikaa ko kirjota vain hopusti ylös! Vaiha sinun sanat sitte kirjotuskaverin kansa. Kirjota keväruno missä vähinthään kaksi sinun kaverin sannaa oon myötä. Lukekaa sitte teän runot toisile.
Sama pukstaavi - Kirjota runo missä niin monta sannaa ko maholista alkaa samala pukstaavilla, esimerkiksi M- pukstaavilla. Harjotuksen saattaa mielellänsä tehä yhessä.
Färiruno - Mikä oon sinun favuriittifäri? Mikä asia eli tunne passaa sen färin kansa? Eli joku elläin? Joku paikka luonnossa eli kaupunkissa? Eli muuta joka tullee miehleen ko sie aattelet sinun favuriittifäriä? - kirjota ylös! Nyt sulla oon useampi sana jokka kuuluu yhtheen sinun favuriittifärin kans ja olet valmis kirjothaan runon, t.ex Minun viheriäinen runo.
Rimmaa - Keksi niin monta sanaparia ko maholista jokka rimmaa. Tehkää mielelänsä yhteistyötä.
Paikat - Onko paikkoja, kaupunkinosia eli kyliä sinun likelä joila oon erikoinen nimi? Mitä se nimi tarkottaa? Kirjota runo mikä kuuluu yhtheen paikan nimen kansa. Kysy mielenlänsä apua aikuselta joka saattaa auttaa sinua.
Toisten runot
Täältä sie löyät muutaman rohki fiinin runon jokka lapset oon kirjottannu Polarbiblossa. Sie saat käyttää niitä ette saat ideoita ja inspiraatiota. Mutta muista ettet vain kopieeraa sitä mitä muut oon kirjottannu!
Lykkyä tykö sinun runon kans!