Barre seedth
- Hallo!
Anna gæljoeji. Ij naakenh svåårh. Dellie mejtie tjidtjie barkosne annje. Anna soffese veedtsi gællasji. Guhkies biejjie skuvlesne orreme. Goh sov tråajjam jïh gaamegh noeleme, dellie tjoejem telefovneste govli. Dïhte sov telefovnem veelti jïh orre bïevnesem vööjni.
“Jonas sæjhta dov voelpem årrodh.”
Ij Anna dan gellie voelph utnieh guktie gosse dam vööjni, dellie rikti feejjene sjïdti. Dïhte dellie raakte Snapchatese vöölki jïh Jonasen voelpine sjïdti. Ånnetji tïjje vaasa åvtelen vihth vööjni:
“Jonas tjaala..”
Anna raakte dej chatese vöölki jïh vuertieji vuejnedh maam Jonas tjeeli.
“Hej, mov nomme Jonas jïh manne sïjhtem dov voelpem årrodh. Sïjhth datne mov voelpem årrodh?”
Jonas gihtji.
“Heia Jonas. Jaavoe, manne sïjhtem dov voelpem årrodh :), men man båeries datne?”
Anna svååri.
“Manne leam 16 jaepien båeries, nååts datne dellie?” “Manne novh gujhth 15 jaepien båeries.”
Ij Anna dan geerjene orreme guhkiem tïjjem daelie. Dellie maajetjh manne aaj voelpem åtnam, Anna ussjede.
Anna jïh Jonas abpe biejjiem soptsesteminie. Anna åadtjoeji govledh Jonase lyjhki skuvterem vuejedh jïh aaj juelkietjengkerem tjïektjedh. Dïhte aaj jeahteme seamma staaresne årroeminie. Anna åarajamme, men læjhkan dïhte fahkeles tjaelieminie sov orre voelpine. Jonase lij guvvieh seedteme mah vuesiehtieh guktie satne vååjnoe jïh Anna seamma darjoeji.
Dah guaktah guhkiem jïjjege tjaelieminie. Faahketji dellie Jonase eelki ånnetji rovnegslaakan dåemiedidh. Dïhte eelki gihtjedh jis Anna naan mïelehkh åvtelen åtneme jïh jis dïhte bohkeme.
“Ijje, im gåessie mïelehkem åtneme, men manne vaajtelem aktem mïelehkem gosse ånnetji båarasåbpoe sjïdtem”, Anna tjaala.
“Man åvteste ij daelie? Manne maahtam dov mïelehkem årrodh :)” Jonase svååri.
Anna ussjedi ånnetji, men dellie jååhkesji Jonasen mïelehkem årrodh.
“Hijven, maahtah guvviem seedtedh gusnie datne båadtsode?”
Jonase gihtji. Idtji Anna rikti daejrieh maam edtji darjodh. Govli sov telefovne tjoejem darjoeji ikth vielie aejkien.
“Datne dan tjaebpies. Manne sïjhtem barre aktem guvviem vuejnedh.”
Idtji Anna sïjhth guvviem sov båadtsode kråahpeste seedtedh, men dïhte lij nov sov mïelehke daelie, ij goh? Ånnetji tïjje vaasa åvtelen orre bïevnesem seedti.
“Ok”, Anna svååri jïh guvviem Jonasese seedti.
“Gæjhtoe, buerie jïjje”, Jonase svååri. Mænngan dam Anna aaj nahkesti.
Mubpien biejjien Anna fahkaji jïh sov telefovnem vuartasji jis naan orre bïevnesh åådtjeme. Dellie vööjni tjåadtjoeji:
“Jonas ij dov voelpe vielie.”
Man åvteste dïhte dam dorjeme? Jïh maam manne dorjeme? Anna sov vaarjoeh tseeki jïh aeredsbeapmoem byöpmedi åvtelen skuvlese veedtsi.
Goh skuvlese båata, dellie gåvla naan nïejth mah föörhkedieh jïh sov vööste tjuvtjiedieh. Mejstie dah föörhkedieh? Anna ussjede. Goh tæjmose vaadtsa, dellie vuajna maam joem.. Gaajhkh mah sov baaktoe vaedtsieh satnem jidtieh. Mij lea gaajhkh dovnesigujmie daan biejjien?
Goh sov klaassetjiehtjelasse tjaanga, dellie akte baernie båata sov vööste.
“Guktie Jonasinie gåarede?” jeahta jïh föörhkede.
Goh Anna dam gåvla, dellie gaajhkem guarka. Dïhte håjnohte jïh olkese ruahta. Im gåessie bååstede båetieh, ussjede.
